A militancia e afiliados do partido Kadima estan hoxe acudindo ás urnas este mércores para elixir ao dirixente que sucederá ao seu até agora líder, o primeiro ministro Ehud Olmert, obrigado a dimitir pola súa implicación en varios casos de corrupción. A votación, á que estaban chamados os 74.000 membros de Kadima, comezou ás 10 da mañá en 114 oficinas electorais espalladas por todo o país. As urnas pecharán ás 19H00 GMT e o resultado final coñecerase probablemente durante a noite. Segundo as sondaxes, a favorita na carreira pola dirección do partido no poder é a ministra de Exteriores, Tzipi Livni, de 50 anos, considerada como pragmática en temas como o proceso de paz e a cuestión nuclear iraniana. Livni, que fai fincapé na súa honradez, promete dar un aire novo a un partido sacudido por unha serie de escándalos de corrupción que implicaron á súa dirección. A chanceler conta co apoio da contorna do ex primeiro ministro Ariel Sharon, que fundou o partido en novembro de 2005 e atópase en coma desde xaneiro de 2006 por mor dun ataque cerebral. Livni enfróntase ao ministro de Transportes, Shaul Mofaz, de 59 anos, que se forxou unha reputación de partidario da forza, pero ao que os seus adversarios acusan de oportunismo tendo en conta as moitas veces que cambiou de chaqueta no pasado. Ex xefe do estado maior e ex ministro de Defensa, Mofaz centrou a súa campaña para as primarias na súa experiencia en materia de seguridade. Avoga pola opción militar contra Irán, oponse a calquera concesión a Siria e está a favor das operacións militares para matar os xefes do movemento palestino Hamas. Ambos candidatos descartaron a firma dun acordo coa Autoridade Palestina antes de finais de 2008, algo que Olmert esforzábase por lograr.
Livni dispón dunha clara vantaxe segundo as sondaxes, pero no pasado estas enquisas de opinión equivocáronse no relativo a primarias de partido. Livni aparece actualmente como a personalidade máis popular de Kadima, pero Mofaz dispón dun forte apoio da base e dos cargos electos locais. Para ser elixido na primeira volta, o futuro xefe de Kadima deberá obter máis do 40% dos votos. De non ser así, organizarase unha segunda volta o 24 de setembro. Outros dous candidatos, con poucas posibilidades de éxito, concorren nestas primarias, as primeiras desde a creación do partido. Trátase de Meir Shetreet, ministro de Interior, e Avi Dichter, ministro de Seguridade Interior. O vencedor tentará formar un novo goberno e se fracasa deberá enfrontarse en lexislativas anticipadas ao xefe da oposición conservadora, o ex primeiro ministro Benjamin Netanyahu, xefe do partido Likud, que encabeza todas as sondaxes de opinión. Olmert xa prometeu dimitir en canto sexa elixido o seu sucesor na dirección de Kadima. Con todo, permanecerá á cabeza dun goberno de transición ate que se forme un novo gabinete.
Comentarios