SEMPRE

Por Rosa Montero

En Arabia Saudita condenaron a seis meses de cárcere e 200 lategazos a unha moza de 18 anos que foi violada por sete homes. Castígana porque, no momento do asalto, ela estaba falando cun amigo, e estar xunto a un home "sen parentesco" alí é un delito. Non falamos dunha rexión primitiva e remota, senón de Arabia Saudita, un país riquísimo e amigo de Occidente. Pregúntome que faremos agora con tan incómodo colega para impedir este atropelo. Tamén me pregunto que opinan do caso todos eses individuos que avogan polo relativismo cultural. Aqueles que din que non podemos xulgar as sociedades islámicas desde Occidente. E que os nixerianos e iranianos que lapidan ás adúlteras, por exemplo, teñen as súas razóns culturais para facelo, razóns que non podemos entender e que debemos respectar. Aínda que pareza mentira, hai persoas cultivadas que sosteñen tal cousa, e o argumento utilizouse na crise das viñetas de Mahoma. Esta falacia finxe ser respectuosa co contrario, pero en realidade é paternalista e covarde: desdeña a capacidade ética do outro e evita axudar ao oprimido. En todas as sociedades houbo individuos que souberon denunciar os abusos da contorna. Romanos que clamaron contra a escravitude e renacentistas que combateron o xenocidio indíxena. En canto ao Islam, hai unha marabillosa tradición de intelectuais tolerantes: "O meu corazón contén todo/ Unha pradería onde pastan as gacelas/ un convento de monxes cristiáns/ un templo para ídolos / a Kaaba do peregrino/ os rolos da Torah/ e o libro do Corán", dicía, no século XII, o poeta sufí Ibn Arabí. O malo non é o Islam, senón os integristas. Non é un problema de cultura nin de ética, senón de desenvolvemento social e político. E as atrocidades foron e son atroces sempre e en todas partes.