Despois do lamentábel espectáculo protagonizado polo BNG e AGE o pasado ano co seu veto á aprobación dunha declaración institucional, veto que recibiu os calorosos parabéns de toda a ultradereita, negacionistas e neonazis de Europa, este ano o noso Parlamento foi quen de aprobar onte no primeiro Pleno do ano, unha solemne Declaración Institucional con motivo do Día Internacional de Recordo das Vítimas do Holocausto. Parabéns a todos nós, galegas e galegos, que non mereciamos o bochornoso veto á Memoria (entre as vítimas centros de galegos mortos nos campos nazis) e que saudamos a boanova de ver a nosa casa común no mesmo lugar que os demais Parlamentos da Europa máis civilizada e democrática.
Declaración institucional do Parlamento de Galicia sobre o Día Internacional de conmemoración anual en memoria das vítimas do Holocausto
O 1 de novembro de 2005, a Asemblea Xeral das Nacións Unidas, na súa 42ª sesión plenaria, reafirma que o Holocausto, que tivo como resultado que un terzo do pobo xudeu e innumerables membros doutras minorías morresen asasinados, será sempre unha advertencia para todo o mundo dos perigos do odio, o fanatismo, o racismo e os prexuízos. E tamén decidiu designar o 27 de
xaneiro como Día Internacional de conmemoración anual en memoria das vítimas do Holocausto, todas elas vítimas do nazismo, entre as que se contan tamén galegos e galegas.
A Asemblea Xeral rexeitou, e este Parlamento faina súa, toda negación, xa sexa parcial ou total, do Holocausto como feito histórico. E condenou sen reservas –condena que tamén este Parlamento fai súa – todas as manifestacións de intolerancia relixiosa, incitación, acoso ou violencia contra as persoas ou as comunidades baseadas na orixe étnica ou nas crenzas relixiosas, onde quer que teñan lugar.
O Parlamento de Galicia constata, coa Asemblea Xeral das Nacións Unidas, que o descoñecemento e o menosprezo dos dereitos humanos orixinan actos de barbarie aldraxantes para a conciencia humana.
O Parlamento de Galicia, en fin, de acordo coa letra e co espírito da Declaración do 1 de novembro de 2005 da 42ª Asemblea Xeral das Nacións Unidas, chama ao Goberno da Xunta a traballar arreo contra os posibles brotes de racismo, xenofobia e discriminación baseados na orixe étnica ou nas crenzas relixiosas, e aos cidadáns e ás súas organizacións a permaneceren vixiantes para que nunca máis un réxime como o que produciu o Holocausto poida asentarse entre nós nin en ningún lugar do mundo.
Santiago de Compostela, 11 de xaneiro de 2014
Comentarios