De Bamiyán a Compostela





Por Andrés Pavón

No 2001 o goberno dos talibán afganos derrubou os coñecidos como Budas de Bamiyán. Tratábase dunhas esculturas de entre os séculos V e VI excavadas na roca e consideradas pola UNESCO como patrimonio da humanidade. Unhas cargas explosivas puxeron fin en segundos a séculos de historia. Ese é o máis destacado dos exemplos recentes de cómo en nome de determinadas ideoloxías se é capaz de destruir o mellor da creación humana para intimidar a quen as cuestiona, borrar os restos dun pasado que nos farían pensar, demostrar poder ou simplemente por pura saña.
No século XVI, Giordano Bruno foi queimado vivo por defender algo tan perigoso como a teoría heliocéntrica. E xa na pasada centuria tanto Hitler como Pinochet amosaron a súa mestría á hora de queimar libros que puideran facer reflexionar sobre o convinte ou non das súas “políticas”.
Lonxe de demostrar forza, os ataques ás manifestacións culturais so deixan ás claras a incapacidade para debatir e a ausencia de intelecto para facer prevalecer os nosos postulados. Así se lle atribúe a tan sinistro personaxe como Millán Astray a frase “muera la inteligencia”.
Agora certos individu@s que comparten patria chica con Millán Astray e que se agrupan baixo as siglas Alternativa Galega de Esquerdas (AGE) pretenden que se prohiba un concerto en Santiago da cantante israelí Ajinoam Nini, máis coñecida como Noa. Como desta volta se impuxo o sentido común e o concerto vai ser celebrado, é de esperar que os mebros de AGE acudan ás portas da Cidade da Cultura a facer todo o ruido posible e, moito me temo, a provocar algún altercado no que –por suposto- se presentarán como as vítimas. Igualiño igualiño que facían os camisas pardas da SA nos primeiros anos do partido nazi.
Dende AGE piden a suspensión do concerto por considerar que Noa representa un estado que eles califican de terrorista a ao que acusan de practicar limpezas étnicas. Non vou entrar aquí nun debate sobre a política israelí e os seus condicionantes pero si que me sinto obrigado a defender a Noa.
Aínda se foran certas –que non o son- as acusacións de AGE hacia Israel, qué culpa tería Noa das decisións do seu goberno? É acaso a cantante membro do executivo hebreo ou das forzas de seguridade?. Son os seguidores galegos de Noa responsables do que se faga en Israel e, polo tanto, debemos privalos de desfrutar do concerto?.
Aplicando a lóxica de AGE, habería que boicotear os restaurantes e artistas chinos xa que –nese caso si- está demostrado que practican o ensañamento cos tibetanos e cos propios habitantes da China rural. Tamén sería lóxico –segundo as teorías dos acólitos do tándem Beiras-Díaz- que se produciran boicots a artistas galegos en Extremadura tendo en conta os crimes que os militares galegos Franco, Tella ou o antedito Astray perpetraron contra a poboación civil desa comunidade…Xa postos, prohibamos que o galego Manu Chao cante en Galicia. Ao fin e ao cabo tamén é francés e velaí a batalla de Elviña para amosar a perfidia gabacha…
Noa é unha das cantantes máis recoñecidas do mundo e poder contar con ela en Galicia é todo un privilexio. Só vai vir compartir con nós a súa música e, como dixo Schoppenhauer, na música tódolos sentementos volven ao seu estado puro e o mundo non é senon a música feita realidade.
Que os poucos que van ir boicotear a Noa non dean tan mala imaxe dos milleiros de galegos que admiramos a arte.

Comentarios