“O Islam non é positivo para as mulleres” Isto é o que sostén a escritora e xornalista suíza Mireille Vallette, autora do libro Islamofobia ou lexítima desconfianza que ven de xerar grande polémica. Militante feminista e membro histórica do Partido Socialista, considera positivo o resultado do referendo que prohibe a construción de minaretes en Suíza. Mireille Vallette recibiu a swissinfo.ch nun céntrico café de Xenebra para analizar os resultados da votación do pasado 29 de novembro e explicar o seu rexeitamento ao que considera como "penetración do integrismo en Suíza". Eis a entrevista.
Habituados a escoitar un discurso crítico cara ao Islam en boca de homes da dereita nacionalista, as observacións dunha muller de esquerdas e feminista posúen un interese particular.
swissinfo: Cando comeza a súa loita contra o integrismo islámico?
Mireille Vallette: A primeira vez que abrín os ollos a esta realidade foi en 1979, grazas á Revolución Iraniana. Entón militaba eu no Movemento de Liberación Feminino (MLF) e unha colega xornalista logrou entrevistar ao ayatola Jomeini no seu retiro francés. As esixencias ás que tivo que someterse para poder falar co líder relixioso fixéronme ver que o Islam fundamentalista non podía ser positivo en absoluto para a condición da muller. Por tanto, como feminista comecei a tomar distancia deles e estudar o islamismo con atención.
swissinfo: E cal é a relación con Suíza?
M.V.: En varias ocasións entrevistei a pensadores e líderes islámicos integristas sobre cuestións moi concretas como poden ser as súas posturas sobre a poligamia, a desigualdade na herdanza entre fillos e fillas, o dereito á apostasía (renuncia ao Islam) ou a xeneralizada falta de reacción musulmá ante o terrorismo islamita. Xamais obtiven respostas satisfactorias. Pero tampouco obtiven respostas do Partido Socialista, cuxa dirección non da a cara ante estes problemas. Iso fíxome tomar cada vez máis distancia das elites políticas, que non escoitan á xente.
swissinfo: Ao seu entender, por que ocorre tal fenómeno?
M.V.: Porque unha reivindicación de base do socialismo e a esquerda é a defensa dos dereitos do inmigrante. De todos os inmigrantes, sen excepción nin filtros de ningunha clase. Iso explica o apoio cego das direccións das esquerdas europeas á inmigración árabe e musulmá. Pero o certo é que hai miles de musulmáns moderados en Suíza e Europa baixo a presión integrista, un feito que debe ser denunciado. Preocúpame que ninguén se expoña seriamente a necesidade de saber o que ocorre nestas sociedades paralelas que se están a formar dentro de Europa.
swissinfo: A que se refire con "sociedades paralelas"?
M.V.: Penso que o Islam en Suíza penetra aos poucos coa súa lóxica todas as estruturas que até agora se mantiñan como esencialmente laicas: a escola ante todo, daquela a saúde, o lecer, etc. O Islam infíltrase en todo o espazo que se lle permita ocupar, impondo a súa lei e prohibindo toda disensión ou crítica ao seu respecto, por razoada e sensata que sexa. Cando adquiran a masa crítica que lles permita influír politicamente, farano. Non lle caiba a menor dúbida.
swissinfo: É por estas razóns que chega vostede a escribir o seu libro?
M.V.: O meu libro foi descualificado por algúns como un panfleto, pero outros analistas -tamén de esquerdas- pensan que debería ser unha lectura obrigatoria para os xornalistas encargados de cubrir o referendo do 29 de novembro. En xeral, os medios de comunicación limitáronse a interrogar aos mesmos portavoces islámicos de sempre: Tariq Ramadan, Hafid Ouardiri e outros integristas, quen son, en realidade, os responsábeis últimos do resultado da votación dos cidadáns suízos. Esta xente non se sitúa xamais de xeito claro e progresista. Nos debates afirman non apoiar a violencia islamita, pero sempre parecen estar dispostos a comprendela.
swissinfo: Como analiza o resultado da votación do 29 de novembro?
M.V.: O que sucedeu é unha faísca de esperanza nunha paisaxe no que as elites favorecen o escurantismo. Liberouse a palabra. É evidente que un resultado do 58% a favor non puido abarcar só aos votantes da Unión Democrática do Centro (UDC, dereita nacionalista), senón que moitas feministas, socialistas, centristas e outras forzas moderadas quixeron pasar unha mensaxe inequívoca á clase política e aos integristas musulmáns.
swissinfo: Por que á clase política?
M.V.: Porque o abismo existente entre a opinión pública europea e as elites políticas, mediáticas e culturais é moi preocupante. En canto a Suíza, é posíbel que as numerosas iniciativas para anular a vontade popular prosperen, dadas as grandes presións e intereses en xogo, pero iso sería unha arma de dobre fío.
swissinfo: Por que?
M.V.: Porque o perigo sería a deslexitimización da clase política. Ou sexa, que o pobo xa non recoñeza aos políticos como os seus representantes. E ese é un prezo moi alto a pagar en Berna. Preocúpame moito que a gran pregunta que parece facerse o Consello Federal (goberno) sexa acerca de como anular o resultado do referendo, no canto de interrogarse seriamente sobre cales son as verdadeiras motivacións que levaron ao pobo suízo a pronunciarse desta maneira. Hai un paternalismo e un desprezo da vontade popular que me parecen moi graves.
swissinfo: Pode dar un exemplo?
M.V.: Pense no caso de Christophe Darbellay (presidente do Partido Demócrata Cristián) quen avogou tras o irresistible resultado do referendo por medidas estritas e un maior control da inmigración musulmá. Pois ben, Darbellay viuse obrigado a desdecirse e a pedir perdón publicamente. Foi un linchamento político en toda a regra, posto que ninguén pode alzar a voz contra o Islam en Europa.
swissinfo: Que responde os observadores que alegan que os musulmáns de Suíza están ben integrados?
M.V.: Está por ver que o fundamentalismo non ocupe un enorme espazo en Turquía. E creo que os alemáns poden dar testemuño da "integración" turca, sen esquecer a que corrente política pertence o actual primeiro ministro de Turquía. O certo é que mesmo os turcos moderados están sob o poderoso influxo dos fundamentalistas.
swissinfo: Vostede é unha militante e combatente feminista desde sempre.
M.V.: Como feminista non podo tolerar unha relixión que diaboliza o corpo da muller e xustifica os castigos físicos ou a poligamia. De feito, cústame entender que unha muller occidental poida tolerar e avalar estas prácticas. Pero o máis incríbel é que comezamos a tolerar ritos e prácticas mesmo antes de que os musulmáns nolo demanden. É unha forma de autocensura marcada pola omnipresente corrección política.
swissinfo: E que opinan as demais feministas?
M.V.: A militancia feminista de hoxe é profundamente académica e está afastada da realidade da rúa. Ademais, moitas feministas son igualmente socialistas, o que as leva a ter unha visión idealizada e anxélica da inmigración.
swissinfo: Hai voces que claman por unha "alianza de civilizacións"...
M.V.: Creo que a Alianza de Civilizacións, propugnada polo presidente do Goberno español José Luís Rodríguez Zapatero, o primeiro ministro turco Erdogan e Suíza, é unha iniciativa moi perigosa. Pon en planos de igualdade realidades que non o son, e tenta convencer aos pobos de Europa de que as súas ideas sobre o Islam están equivocadas, en contra de toda evidencia razoable. A base de diñeiro, queren cambiar as nosas ideas e a nosa educación.
swissinfo: Teme vostede por Suíza a partir desta decisión?
M.V.: Non creo nun estalido de violencia ou nun boicot xeneralizado do mundo musulmán contra Suíza, pero si creo que a decisión do pobo suízo levará aos musulmáns moderados deste país a achegarse aínda máis aos integristas. Velaquí o grande perigo para a democracia.
Unha entrevista de Rodrigo Carrizo Couto, Xenebra para swissinfo.ch http://www.swissinfo.ch/spa/noticias/politica_suiza/El_Islam_no_es_positivo_para_las_mujeres.html?cid=7950652
Comentarios