O novo antisemitismo


Por Josep Carles Laínez
.
Moitos intelectuais, en Europa e en América, están a avisar con tempo, pero até agora ninguén parece decatarse do horror que pode vírsenos encima. Xa non é tan só Rodríguez Zapatero quen se fotografa cun símbolo terrorista, senón Benedito XVI, o mesmo que rezou nunha mesquita e axitou riseiro unha banderiña turca; non son unicamente réximes totalitarios os que avogan pola destrución de Europa ou de parte dela, senón que a mesma ONU, tomada por ditadores, quere darnos leccións de quen é racista ou quen está ameazado en verdade. No transfondo, esa pavorosa "alianza de civilizacións", á cal se suma o intento de Barack Obama de ser Papá Noel, e a vontade dos grandes medios de comunicación, unidos á progresía, de asegurar ao mundo que outra vez son os xudeus os culpables de todo. Grande parte da esquerda debería explicar por que considera progresista hoxe o que até hai poucos anos era un estigma neonazi (o odio e o ataque ao Estado de Israel).
.
E tamén debería reflexionar no porqué da súa inquina contra todo aquilo que incomoda aos réximes islámicos. As consignas dos movementos alternativos e antiglobalización están a preparar o camiño dunha persecución contra o xudeu que nalgúns lugares xa deu comezo. E que non lle enganen. Os antisemitas de hoxe senten polo pobo palestino o mesmo amor que por calquera outro. Agora ben, o básico é culpabilizar aos xudeus, sexan os seus opoñentes árabes, chineses ou mayas. Se non fose así, por que non engaden á súa rabia contra Israel unha furia desatada contra China (polo Tíbet), contra Alxeria (pola Cabilia), contra Rusia (por Xeorxia), contra Turquía (por Chipre)? e tantos outros conflitos no mundo? Moi sinxelo: neses territorios, os xudeus non poden ser estigmatizados, atacados e vexados. Göbbels sentiríase orgulloso. E os últimos redutos daquela ideoloxía nunca pensarían confraternizar cos seus eternos opoñentes: ese espectro da esquerda boba, da extrema esquerda e do comunismo empeñados en salvar sempre a algún pobo das temibles fauces americano-sionistas. Co comezo do século XXI obsérvase, tal e como analizou maxistralmente Alejandro del Valle, que un case inexistente fascismo, a vella garda vermella e o movemento alternativo danse a man na que pretenden loita definitiva contra o mal do planeta: o pobo xudeu e, en concreto, o Estado de Israel.
.
O furioso antisemitismo dos séculos XIX e XX infiltrouse en quen, en principio, deberían sentirse atraídos polo socialismo israelí, polos kibbutzim sionistas, polos logros conseguidos, desde a nada, por un país ao que todos auguraban poucas décadas de vida. é máis: o antisemitismo non só ten gangrenado nesas capas de esquerda, senón que o altermundismo fixo do odio ao israelí o motor da súa existencia. Adultos e novos que na súa vida viron a un xudeu (e menos en España) desprézano desde o máis profundo de si mesmos. E isto non é posicionamento político, senón xudeofobia, é dicir, antisemitismo baixo os adornos dun antisionismo ben visto e que vende solidariedade. Durante a Segunda Guerra Mundial, as nacións de Europa asistiron caladas ao roubo, a deportación e o exterminio de seis millóns de compatriotas debido á súa tradición relixiosa. No momento en que Gene Kelly e Frank Sinatra rodaban "Levando áncoras" alén do Atlántico, eran gaseados millóns de europeos. A comparación aterra, e aterra aínda máis ler os testemuños, como o arrepiante Diario de Hélène Berr, que debería ser lectura obrigada en institutos. Os movementos alternativos e "antisionistas" (en verdade, antisemitas), o islamo-nazismo e os pseudointelectuales que lles seguen o xogo, parecen desexosos de perpetrar un novo holocausto, de condenar ao xudeu á ignominia, primeiro; e despois á morte. Non confíe no de "contra os xudeus non temos nada, só contra Israel". Menten. E se non llo cre, mírelles as caras. Se acaban con Israel, chegoulleo turno a Europa.

Comentarios