Kurt Klagsbrunn. Fotógrafo no país do futuro.

A ollada do fotógrafo Kurt Klagsbrunn: un xudeu vienés no Brasil - Presentación da primeira obra publicada en Europa sobre o artista.

Kurt Klagsbrunn en Rio de Janeiro, 1948, © Copyright Victor Klagsbrunn/Editorial Weidle


Entrada do campo de refuxiados na Ilha das Flores/Rio de Janeiro, 1949, © Copyright Victor Klagsbrunn/Editorial Weidle
Eva Perón, Petrópolis, 1947, © Copyright Victor Klagsbrunn/Editorial Weidle
Casa da Literatura - Biblioteca Austriaca do Exilio, Viena:
Presentación & Lectura




Este ano Brasil será o país convidado na Feira do Libro de Frankfurt. Un dos fotógrafos máis importantes do Brasil, Kurt Klagsbrunn (Viena 1918–Rio de Janeiro 2005), vese agora recoñecido coa primeira publicación en alemán sobre á súa figura (e tamén primeira en Europa): “Kurt Klagsbrunn. Fotograf im Land der Zukunft“. Barbara Weidle & Ursula Seeber (edit,). A obra conta con colaboracións de Erich Hackl, Klaus Honnef, Luis Krausz, Marta e Victor Klagsbrunn.
Klagsbrunn, nacido en Viena no seo dunha familia xudía de clase media, tivo que abandonar esta cidade no ano 1938 pola chegada do nazismo. Xunto cos seus pais e o seu irmán exíliase a Brasil desde Lisboa. O pai, químico de profesión, montaría en Rio de Janeiro un pequeno negocio nese ramo, actividade á que se dedicaba antes de ter que fuxir de Viena.
Na súa carreira como fotógrafo no Brasil, Kurt Klagsbrunn documentaría, coa ollada fresca e formalmente consciente dun artista de orixe europea formado na escola da „Nova Visión“ (“Neues Sehen”), o desenvolvemento de Rio de Janeiro, retrataría as xentes nas provincias, acompañaría a fundación de Brasilia e sería o observador de grandes eventos deportivos, como o Mundial de Fútbol de 1950. Tería tamén moi éxito como fotógrafo no mundo da publicidade, a industria e a moda, sendo reporteiro ademáis de importantes revistas como Life.
Na tarde de onte, 07.10.13, foi presentada en Viena unha obra excepcional (é unica en Europa ata o momento) sobre a vida deste grande fotógrafo austriaco-brasileiro: Kurt Klagsbrunn. Fotograf im Land der Zukunft1. Barbara Weidle & Ursula Seeber (edit,), Weidle, Bonn, 2013. A presentación correu a cargo de Ursula Seeber, en representación da “Casa da Literatura” de Viena e Raoul Raoul Kneucker, presidente da “Sociedade de Amigos da Biblioteca Austriaca do Exilio”. O acto contou tamén coa presenza do embaixador do Brasil en Viena, Evandro Didonet.

Ursula Seeber, directora da “Biblioteca Austriaca do Exilio” na “Casa da Literatura” de Viena), encargouse igualmente de presentar o libro e o sobriño de Klagsbrunn e administrador do legado deste, Victor Klagsbrunn, así como a súa esposa Marta, tamén fotógrafa e colaboradora no proxecto de edición da obra; ambos lembraron a figura e as vivencias do seu familiar, o seu compromiso antifascista, así como diferentes anécdotas deste no seu traballo como fotógrafo.
Pola súa banda, o escritor austriaco Erich Hackl encargouse de ler un fermoso texto en lembranza da familia Klagsbrunn e o seu percurso desde Viena ao Brasil, fuxindo do nacionalsocialismo. Por último, houbo un breve coloquio onde se continuaron comentando diferentes aspectos da obra e a vida de Kurt Klagsbrunn, da súa experiencia no exilio brasileiro, etc...
(O acto estivo organizado en colaboración coa editora Weidle de Bonn e contou co apoio do “Jewish Welcome Service” de Viena).

Links de referencia (en portugués, alemán e inglés):











1 Kurt Klagsbrunn. Fotógrafo no país do futuro.

Comentarios