E agora... as inundacións de Gaza...

Nos últimos días, a Franxa de Gaza padeceu inundacións. As causas foron puramente meteorolóxicas, como no ano 2013. Pero desta volta algúns medios non quixeron perder a oportunidade de airear un libelo contra Israel. Examinemos o caso, porque é de carallo, de xulgado de garda...
No día de onte, Al Yazira publicaba unha noticia na que acusaba a Israel de “asulagar Gaza abrindo as presas do sur do país”. Para sustentar a acusación a canle qatarí facíase eco das palabras do xeneral Said al Arabia, xefe da axencia de defensa civil da Franxa:
“Israel abriu as comportas, sen previo aviso, onte pola noite, causando graves danos ás aldeas de Gaza próximas á fronteira” máis de 40 vivendas quedaron asulagadas e 80 familias que atopan actualmente en refuxios como consecuencia diso”.
Hispan TV, a televisión oficial do réxime iraní en español, rápidamente difundiu a noticia, así como Vice News. O libelo foi espallado tamén por France Press, que incluso produciu unha reportaxe e vídeo no cal habitantes da Franxa acusaban a Israel das choivas e inundacións.
Hai un pequeno problema en todo isto... no sur de Israel non hai nin unha soa presa.
O Daily Mail británico publicou unha noticia encabezada con este titular:
“Centos de palestinos quedan sen casa despois de que Israel abrise as presas dos ríos e asulagase Gaza, horas antes a compañía eléctrica do Estado xudeu cortou a electricidade en cidades da Marxe Occidental”.
O Mail foi máis aló que Al Yazira, Hispan TV, Vice News ou AFP e tentou conectar os cortes eléctricos nas cidades de Nablús e Yenín, que tiveron lugar por espazo de só 45 minutos o pasado luns, coas inundacións en Gaza, provocadas por unha avaria xeral debido as fortes choivas dos últimos días en toda a rexión.
O Mail corrixiu o titular e eliminou as referencias ás inexistentes presas do sur de Israel, pero seguiu mantendo a acusación de que a inundación foi provocada. O caso da inundación provocada de Gaza non fai senón corroborar o que levamos anos denunciando: contra Israel, nos medios, vale todo; e en moitas ocasións a intención non é en absoluto informar senón simplemente difamar.

Comentarios